जळगाव –
मूळजी जेठा (स्वायत्त) महाविद्यालयात ‘वंदे मातरम्’ गीताच्या १५० व्या वर्षपूर्तीनिमित्त एका विशेष कार्यक्रमाचे आयोजन करण्यात आले होते. या कार्यक्रमात महाविद्यालयीन विद्यार्थी आणि शिक्षक मोठ्या संख्येने उपस्थित होते.
या कार्यक्रमाला महाविद्यालयाचे प्राचार्य डॉ. संजय भारंबे यांची विशेष उपस्थिती लाभली. त्यांच्यासह प्रा. जुगलकिशोर दुबे, प्रा. विशाल देशमुख, एन.सी.सी. प्रमुख प्रा. योगेश बोरसे आणि रजिस्टार जगदीश बोरसे आदी मान्यवर उपस्थित होते.
कार्यक्रमाच्या वेळी प्रा. जुगलकिशोर दुबे यांनी ‘वंदे मातरम्’ या गीताचा सखोल इतिहास विद्यार्थ्यांना सांगितला. त्यांनी या गीताचे राष्ट्रीय चळवळीतील महत्त्व, त्याची निर्मिती आणि १५० वर्षांच्या प्रवासात त्याने दिलेल्या योगदानाबद्दल माहिती दिली. विद्यार्थ्यांनी मोठ्या उत्साहाने ही माहिती ऐकली आणि ‘वंदे मातरम्’ च्या गौरवशाली परंपरेचे महत्त्व जाणून घेतले.
प्राचार्य डॉ. संजय भारंबे यांनी आपल्या अध्यक्षीय भाषणात ‘वंदे मातरम्’ हे केवळ एक गीत नसून ते राष्ट्रीय अस्मिता आणि प्रेरणा आहे, असे मत व्यक्त केले.
हा कार्यक्रम यशस्वी करण्यासाठी शिक्षक आणि शिक्षकेतर कर्मचाऱ्यांनी विशेष परिश्रम घेतले.
