जळगाव- के.सी.ई. सोसायटी संचलित इन्स्टिट्यूट ऑफ मॅनेजमेंट अँड रिसर्च, येथे २२ जानेवारी २०२६ ते २५ जानेवारी २०२६ दरम्यान क्रीडावेध महोत्सवाचे आयोजन करण्यात आले आहे. या महोत्सवाचे उद्घाटन आज उत्साहपूर्ण वातावरणात पार पडले. कार्यक्रमाचे उद्घाटन इन्स्टिट्यूटचे संचालक प्रा. बी. व्ही. पवार यांच्या हस्ते झाले, उद्घाटन प्रसंगी संचालक प्रा. बी. व्ही. पवार यांनी विद्यार्थ्यांना मार्गदर्शन करताना सांगितले की, “शैक्षणिक प्रगतीसोबतच शारीरिक तंदुरुस्ती व मानसिक संतुलन राखण्यासाठी खेळांचे महत्त्व अनन्यसाधारण आहे. क्रीडा स्पर्धांमधून विद्यार्थ्यांमध्ये संघभावना, नेतृत्वगुण, शिस्त व आत्मविश्वास निर्माण होतो. प्रत्येक विद्यार्थ्याने अभ्यासासोबत खेळांमध्येही सक्रिय सहभाग घ्यावा,” असे आव्हान केले. कार्यक्रमाचे प्रास्ताविक इन्स्टिट्यूट च्या क्रीडा संचालक डॉ. नीलिमा पाटील यांनी केले, सूत्र संचालन डॉ. दिपाली पाटील यांनी केले, या प्रसंगी डीन व्यवस्थापन विभाग, डॉ. ममता दहाड तसेच इतर शिक्षक व शिक्षकेतर कर्मचारी, विद्यार्थी आदी उपस्थित होते. या क्रीडा वेध अंतर्गत विविध इनडोअर व आऊटडोअर खेळांचे आयोजन करण्यात आले असून विद्यार्थ्यांचा मोठ्या प्रमाणावर सहभाग नोंदविण्याचे आव्हान करण्यात आले. दि. २२ जानेवारी रोजी सकाळी बुद्धिबळ व दुपारी कॅरम स्पर्धाचे आयोजन करण्यात आले आहे. दि. २३ जानेवारी रोजी क्रिकेट, बॅडमिंटन, कबड्डी स्पर्धाचे आयोजन एकलव्य क्रीडा संकुल येथे करण्यात येणार आहे. दि. २४ जानेवारी रोजी सकाळी टेबल टेनिस, संगीत खुर्ची, रस्सी खेच या स्पर्धांचे आयोजन करण्यात येणार आहे. दि. २५ जानेवारी रोजी फुटबॉल व व्हॉलीबॉल स्पर्धांचे आयोजन एकलव्य क्रीडा संकुल येथे करण्यात येणार आहे. या क्रीडा महोत्सवामुळे विद्यार्थ्यांमध्ये क्रीडाविषयक आवड निर्माण होत असून आरोग्यदायी जीवनशैलीचा संदेशही दिला जात आहे. संपूर्ण महाविद्यालय परिसरात क्रीडावेध महोत्सवामुळे उत्साहाचे व चैतन्याचे वातावरण निर्माण झाले असून हा उपक्रम विद्यार्थ्यांच्या सर्वांगीण विकासासाठी निश्चितच उपयुक्त ठरणार आहे.
