जळगाव : बालदिनानिमित्त रेडिओ मन भावन 90.8 एफ.एम. तर्फे आयोजित विशेष कार्यक्रमात ज्युनिअर आरजे स्वरा हिने जळगाव जिल्हा क्रीडा अधिकारी श्री. रवींद्र नाईक यांची एक आगळीवेगळी आणि मनमोकळी मुलाखत घेतली.
लहान मुलांनी रेडिओवरून प्रश्न विचारावेत, संवाद साधावा आणि त्यांच्या आवाजातून समाजात सकारात्मकता पोचावी, या हेतूने रेडिओ मनभावनने हा उपक्रम राबविला. या मुलाखतीदरम्यान स्टुडिओमध्ये अगदी खेळीमेळीचं, आनंदाचं आणि उत्साहपूर्ण वातावरण निर्माण झालं होतं.
ज्युनिअर आरजे स्वराने आपल्या निरागस शैलीत क्रीडाविषयक प्रश्नांची सरबत्ती लावताच क्रीडा अधिकारी श्री. नाईक यांनीही अत्यंत मोकळेपणाने आणि प्रेरणादायी पद्धतीने उत्तरे दिली. मुलांमध्ये क्रीडा संस्कृती वाढावी, शारीरिक तंदुरुस्ती बळकट व्हावी आणि जळगाव जिल्ह्यातील उदयोन्मुख खेळाडूंना अधिकाधिक संधी उपलब्ध व्हाव्यात, याबाबत त्यांनी विशेष मार्गदर्शन केले.
यावेळी बोलताना श्री. नाईक म्हणाले की,
“प्ले फॉर फन, फिटनेस आणि हॅपिनेस लक्षात ठेवला पाहिजे.मुलांनी खेळात रस घेतला, तर त्यांचं आयुष्य सुंदर, निरोगी आणि शिस्तबद्ध होतं. जळगाव जिल्ह्यातील प्रत्येक मुलगा–मुलगी क्रीडाक्षेत्रात चमकावी, हीच आमची इच्छा आहे.”यावेळी उत्स्फूर्त प्रश्नोत्तरांमुळे बालदिनाचा अर्थ अगदी उजाळून निघाला. रेडिओ मनभावनचा हा उपक्रम पालक, विद्यार्थी आणि क्रीडाप्रेमींकडून मोठ्या प्रमाणात कौतुकास्पद ठरला.
