विभागीय हॉकी निवडीत नंदुरबारच्या सहा विद्यार्थिनींची चमकदार कामगिरी
नंदुरबार | प्रतिनिधी
‘मिशन लक्ष्यवेध’ उपक्रमांतर्गत क्रीडा निपुणता केंद्र (बालवाडी), पुणे येथे होणाऱ्या विभागीय हॉकी क्रीडा निपुणता केंद्रासाठी शासकीय इंग्रजी माध्यम आश्रमशाळा, नंदुरबार येथील सहा विद्यार्थिनींची निवड झाली आहे. दि. ७ ऑगस्ट २०२६ रोजी झालेल्या निवड चाचणीत या विद्यार्थिनींनी उत्कृष्ट कामगिरी केली.
निवड झालेल्या विद्यार्थिनींमध्ये खुशी सुकलाल पावरा (इयत्ता १० वी), विन्ता गिरीश वसावे (इयत्ता ९ वी), परिधी राजेंद्र अहिरे (इयत्ता ९ वी), प्रीती विश्वास वळवी (इयत्ता ८ वी), सुप्रिया इंदाराम गावित (इयत्ता ८ वी) आणि अर्चना राजमल खर्डे (इयत्ता ८ वी) यांचा समावेश आहे.
महाराष्ट्र शासनाच्या क्रीडा व युवक सेवा विभागाच्या ‘मिशन लक्ष्यवेध’ उपक्रमांतर्गत या विद्यार्थिनींनी आपल्या हॉकी कौशल्याची चमक दाखवत विभागीय स्तरावर निवड मिळवली. पुढील शिक्षण व क्रीडा प्रशिक्षणासाठी त्या पुणे येथे जाणार आहेत. त्यांच्या या यशामुळे शाळेसह नंदुरबार प्रकल्प कार्यालयाचे नाव उंचावले आहे.
या उल्लेखनीय निवडीबद्दल नंदुरबार प्रकल्प कार्यालयाचे प्रकल्प अधिकारी डॉ. चंद्रकांत पवार, सहायक प्रकल्प अधिकारी नंदकुमार साबळे, भानुदास वसावे, देवेंद्र पाटील, योगेश बागल, शिक्षण विस्तार अधिकारी डी. एच. माळी, विजय सोनार, रवींद्र निकम तसेच इंग्रजी माध्यमाच्या प्राचार्या ज्योती निरभवणे आदींनी विद्यार्थिनींचे अभिनंदन करून त्यांचा सत्कार केला.
विद्यार्थिनींच्या यशामागे त्यांची मेहनत, सातत्य व जिद्द यांसोबतच हॉकी प्रशिक्षक भगवान पवार व योगेश कुंभार यांचे मार्गदर्शन महत्त्वाचे ठरले. सहा विद्यार्थिनींच्या निवडीमुळे शाळेतील इतर विद्यार्थ्यांनाही क्रीडा क्षेत्रात उल्लेखनीय कामगिरी करण्याची प्रेरणा मिळाली आहे
