जळगांव : 
रा.प. जळगांव मध्यवर्ती बसस्थानकाच्या इन व आऊट गेटच्या बाजूला खाद्यपदार्थ / चहा / ज्युस इत्यादी विक्रेत्यांचे मोठ्या प्रमाणात अतिक्रमण वाढलेले असल्याने मध्यवर्ती बसस्थानकातून बाहेरगावी जाणाऱ्या बसेस तसेच बाहेर गावाहून येणाऱ्या बसेस बसस्थानकाच्या आत-बाहेर येण्या-जाण्यास मोठी अडचण निर्माण झालेली आहे. त्यामुळे एसटी कर्मचारी मोठ्या प्रमाणात संतप्त झालेले होते. एसटी महामंडळातील संयुक्त कृती समितीने आज शनिवारी दुपारी 1:30 वाजता जळगाव महानगरपालिकेच्या विरोधात तीव्र निदर्शने केली. याप्रसंगी काही काळ समोरील रस्त्यावरील वाहतूक बंद होती. ‘जळगांव मनपा- हाय हाय, मनपा जळगांव- जागे व्हा जागे व्हा, अशा विविध घोषणा देऊन जळगाव मनपाच्या विरोधात निषेध व्यक्त करण्यात आला. तत्पूर्वी जळगांव मनपाचे अधिकाऱ्यांनी घटनास्थळी भेट देऊन अतिक्रमण धारकांना अतिक्रमण काढण्याचे आदेश दिलेत. परंतु सदर अधिकारी गेल्यानंतर दुकानदारांनी परत अतिक्रमण केल्याचे दिसून आल्याने एसटी महामंडळातील कर्मचारी संतप्त झाल्याचे दिसून आले. जळगांव मनपाने सदर अतिक्रमणाबाबत केलेल्या दुर्लक्षामुळे प्रवासी आणि कर्मचाऱ्यांच्या जीवितास धोका निर्माण होत असल्याचे प्रतिपादन एसटी कामगार सेनेचे श्री आर के पाटील यांनी केले. त्याचप्रमाणे पुढील काळात अशाच पद्धतीचे कामकाज सुरू राहिले तर महानगरपालिका जळगाव समोर आमरण उपोषण करण्यात येईल असा इशारा महाराष्ट्र कामगार संघटनेचे अध्यक्ष श्री विनोद शितोळे यांनी दिला. अनेकदा महानगरपालिकेची पत्रव्यवहार करून देखील दिलासा मिळत नसल्यामुळे अनेक कर्मचारी व प्रवासी यांचा अपघात झाला असून यास मनपा प्रशासन जबाबदार असल्याचे वक्तव्य कृती समितीचे संयोजक गोपाळ पाटील यांनी केले. आंदोलन यशस्वी करण्यासाठी सर्वश्री राकेश वाघ, गोपाळ पाटील, आर के पाटील, अनिल पाटील, विनोद पाटील, खुशाल मोरे यांनी विशेष प्रयत्न केलेत. याप्रसंगी एसटी कर्मचारी मोठ्या संख्येने उपस्थित होते.
